Rom 3 | DOB | STEP | 'Enega 'abo nadigega, to'ase sana 'ana bobo'ana 'abo'ada boda nida sieeseda me Yudia? Ta wate to'ase 'ana bobo'ana 'abo Ebelaamo 'ina we'iwe'iyaya bwaladaya silodabena?

Romans 3

1 'Enega 'abo nadigega, to'ase sana 'ana bobo'ana 'abo'ada boda nida sieeseda me Yudia? Ta wate to'ase 'ana bobo'ana 'abo Ebelaamo 'ina we'iwe'iyaya bwaladaya silodabena? 2 Ona'ai'aila, yage bobo'adi yaudi 'edaya simiyami. Ta yage nugana nate Yaubada 'ina ona 'edaya 'isa'una.

3 Ta mwa'adega, 'abo 'aidi ni'atu Yaubada siguitoyasena, wanuwena 'aene Yaubada wate 'ida guitoyaseda aga? 4 Nigeya sa'i. Ona'ai'aila, 'abo tomota maibo'ada kabokaboda, ta Yaubada tebweuna palupaluna, ga tauna manuna Buki Tabu 'isimana, 'igwae, “'Imu ona 'enega sida 'awa palupaluyeyo be 'enega 'imu etala 'enaya 'uda ewaiwai.” 5 'Enega 'eguma 'ida bubuna to'umalina 'enega Yaubada 'ina bubuna bobo'ana 'igie apwesena, nai tada gwae, “Geya'abo Yaubada 'iloiloineda 'ida bubuna to'umalina manuna,” aga? (Ona'ai'aila, gete yaona besobeso 'atuwa nadigega 'aina tomota 'idi ona.) 6 Ta wada nuwa'i'isi 'aene Yaubada toloina palupaluna, 'enega bwa'omatana 'ana tutaya me bale'u maibo'ada loina palupalu 'enega 'ida loineda. 7 'Enega 'aina toekabokaboyao manugu sigwae, “'Imu loguguya 'ena 'ugwae 'aene 'igu kabo 'enega Yaubada 'ina bubuna palupaluna 'igie apwesena tomota 'ediya ga Yaubada situpuna, 'enega geya'abo Yaubada 'i'awa'awa to'umaliyegu. 'Enega 'abo'ama sawesawenaya yage to'umalina 'aguinuwe be 'enega yage bobo'ana 'ida apwesa.” Taudi tomota nidi siona besobeso 'eguya ga 'ilobwenena be Yaubada 'ida loinedi. ^{▼▼ *daba nai lodaba: Nugana 17:10-14 'ena Yaubada Ebelaamo 'iloinena be 'aene tauna be natunao me'olotodi be tubunao me'olotodi 'idi yage bwaladi sida 'upwa yauledi, nate we'iwe'iyaya nai 'ebe 'inana sida guinuwe, ta 'ana mwalatoi taudi Yaubada 'ina tomotaiyao esiesinuwadi.}

Nigeya 'ebweu 'ina bubuna bobo'ana

9 'Enega 'abo'ada me Yudia mwa'adega 'ida miya taudi nigeya me Yudia 'idi miya 'ibobo'ana sinena? Nigeya! Manuna ni'atu yae'iteda 'aene maibo'ada toto'umalida. 10 Nadigega Buki Tabu 'ina simana 'igwae,

“Nigeya 'ebweu yaita 'ina bubuna palupaluna.

11 Ta nigeya wate 'ebweu yaita Yaubada 'ida mwalatonina, nai nuwanuwana be 'ida mwalatoni. Nigeya sa'i!

12 Ona'ai'aila, tomota maibo'adi ni'atu sitauya gesi ga 'eda to'umalina 'ena siapwesa. Nigeya 'ebweu wate yaita 'ina bubuna bobo'ana.”

13 “Ta 'awadi 'atuwa 'ebweu 'ali'ali 'ege'egegena, be 'awadiyega yage to'umali wawasae ta kabokabodi siapweapwesama,”

“Ta wate 'idi onao nadigega mwata bolausao 'ediyega tomota siloemwawasidi.”

14 “Ta onaupaupa to'umalidi 'awadiyega tuta yauyauna siapweapwesa.”

15 “Ona'ai'aila, tomota 'adi loemwawasa nuwadi 'i'ewena.

16 Ta 'abo to sena 'ena sitautauya, 'iabe yage maibo'ana sigie to'umaliyedi.

17 Nigeya 'ebweu wate guguya nai egosigosiyana 'ediya 'imiyami.”

18 “Ta wate nigeya Yaubada 'ana matauta 'ediya 'imiyami.”

19 Ta ni'atu tamwalatonina 'aene Mosese 'ina loinao nate me Yudia 'ada loina, be 'enega geya'abo yaita 'ionaona limana tuta nina Yaubada 'ina bwa'omatana 'ena, manuna maibo'ada toto'umalida.

20 Yaubada 'ina 'awapalupalu nigeya Mosese 'ina loinao 'adi ematamatana 'enega tada lobena, manuna loina 'ina guinuwa nate 'ida to'umalinao 'isimasimana apwesedi.v14 Sam 10:7v15 Ona 1:16v18 Sam 36:1v20 Ga 2:16; Lo 7:7

'Abo Yesu taemisena Yaubada 'ida 'awa palupaluyeda

21 'Enega gete tuga Yaubada 'ada 'awapalupalu 'igieapwesena, 'aene nigeya loina 'enega, ta esi mali 'eda 'enega. Ta 'eda nina ni'atu Mosese 'ina loina be palopitao sisimanena, 22 'aene Yaubada maibo'ada 'ida 'awa palupaluyeda Yesu Keliso 'ana emisa 'enega, be geya'abo 'ebweu wate weyala 'ida miyami 'abo'ada me Yudia be taudi nigeya me Yudia gamwagamwanidaya.

23 Manuna maibo'ada toto'umalida, ga tamiya 'edasola Yaubada 'ina maedana 'enega, 24 ta esi Yaubada 'i'atenuwa 'ole'oleyeda ta 'iobobomeda, ga Yesu Keliso 'enega 'ili'amida 'ida loegesiyao 'ediyega, 'enega Yaubada 'i'awa palupaluyeda. 25 Ona'ai'aila, Yaubada natuna 'itagwalena be 'aene 'ina mwawasega 'ida 'au'ewa limada Yaubada 'enaya be ma'eda tada egosigosiyana, nate 'abo Yesu taemise. Gete 'enega Yaubada 'ina bubuna bobo'ana 'ie'iteda, manuna lowaenei 'ida bubuna to'umalina manudi nigeya 'ie'ie'isa, ta esi 'ie'alama'i'itana ga 'ana laba Yesu Keliso 'ietunenama 'edaya.

26 'Enega gete tuga 'ina bubuna palupaluna 'ie'ie'itada 'aene tauna palupaluna, manuna Yesu 'ana toemisao 'i'awa palupaluyeda. 27 'Enega mwa'adega, 'ilobweneda taonatu'e yage gete manuna? Nigeya sa'i! Manuna 'ida emisa namo 'enega 'i'awa palupaluyeda, ta nigeya loina 'ana ematamatana 'enega. 28 'Enega nuwanuwa gete 'ana bwagila 'aene tomota 'ida emisega Yaubada sawesawenaya be 'i'awa palupaluyeda ta nigeya loina 'ana ematamatana 'enega. 29 Ta 'aene Yaubada me Yudia dimo 'idi Yaubada, be 'aene nigeya sena maibo'adi watei? Nigeya! Sena maibo'adi be 'abo'ada wate 'ida Yaubada, 30 'ebweuna namo tuga. Tauna 'abo'ada me Yudia 'ida 'awa palupaluyeda 'ida emisa 'enega, be taudi nigeya me Yudia wate 'idi emisa 'enega 'i'awa palupaluyedi. 31 'Enega mwa'adega 'aene gete 'ana mwalatoi be loina taguitoyase ta emisa tagiyai aga? Nigeya! Ta esi 'ilobweneda loina ta'amayabe, be 'edaya 'ida sinabwa.